អាឡាស្កា៖ យន្តហោះពិសេសជូនដំណើរគណៈប្រតិភូកម្ពុជាដែលដឹកនាំដោយ សម្ដេចតេជោ កំពុងចុះចាក់សាំងនៅរដ្ឋអាឡាស្កា សហរដ្ឋអាមេរិក បន្ទាប់ពីចាកចេញពីរដ្ឋធានីហាវាណា ប្រទេសគុយបា។

ក្នុងសារសំឡេងពិសេសផ្ញើជូនជនរួមជាតិនៅព្រឹកថ្ងៃទី២៦ ខែកញ្ញានេះ សម្ដេចតេជោ ហ៊ុន សែន បានបញ្ជាក់ថា សម្តេចបានមកដល់អាឡាស្កា ទឹកដីសហរដ្ធអាមេរិកហើយ ដើម្បីធ្វើការចាក់សាំង នឹងចេញដំណើរទៅតូក្យូ ប្រទេសជប៉ុន ដើម្បីចូលរួមបុណ្យសពអតីតនាយករដ្ឋមន្ត្រីជប៉ុន លោក ស៊ិនហ្សូ អាបេ។

សម្ដេចតេជោថា៖ «ការធ្វើដំណើរចេញពីហាវ៉ាណា មកអាឡាស្កានេះត្រូវចំណាយពេល ៨ម៉ោងនិង៣០នាទី បន្ទាប់ពីការចាក់សាំងហើយនេះខ្ញុំព្រះករុណាខ្ញុំត្រូវចាកចេញពីអាឡាស្កា ទៅទីក្រុងតូក្យូតាមគម្រោងព្រាងទុកនៃការហោះហើរចំនួន ៧ម៉ោង៤០នាទីដូច្នេះរយៈពេលនៃការធ្វើដំណើរសរុបពីហៅអាណា ទៅកាន់ទីក្រុងតូក្យូ គឺមានរយៈពេលជាង ១៦ម៉ោង»។

ក្នុងឱកាសនៃពិធីបុណ្យភ្ជុំបិណ្ឌផងដែរនាយករដ្ឋមន្ត្រី ក៏បានចូលរួមអបអរសាទរក្នុងការប្រារព្ធពិធីបុណ្យភ្ជុំបិណ្ឌឡើងវិញ ក៏ដូចជាអបអរសាទរចំពោះការគ្រប់គ្រងជំងឺកូវីដ-១៩ បានយ៉ាងល្អផងដែរ។

សម្ដេចតេជោ ហ៊ុន សែន និងស្នាក់នៅទីក្រុងតូក្យូរយៈពេល ២យប់ ដើម្បីចូលរួមពិធីបុណ្យសពអតីតនាយករដ្ឋមន្ត្រីជប៉ុនលោក ស៊ិនហ្សូ អាបេ ហើយសម្ដេចតេជោក៏មានជំនួបជាមួយនឹងនាយករដ្ឋមន្ត្រីជប៉ុនលោក គីស៊ីដា ហ្វូមីអូ ផងដែរ៕